Mateus 5 : 45, Asa tung gabe anak ni Amamuna na di banua ginjang i hamu: Ai dipabinsar do mata ni ariNa tu angka parroha na jahat nang tu na bonar, diparo do udan tu parroha na tigor nang tu na geduk.
Naeng do tandi pangalaho ni halak Kristen di portibion. Jala boi ma nian gabe pasupasu tu na humaliang. Ala hasingkopon ngolu ni jolma ndada sian na mananda ise do hita, alai sadia dao do hita magodang dibagasan Ibana.
Molo tajaha ayat on, tontu sian hata parjolo pe nunga patuduhon na so tarsirang be ayat on sian ayat na diginjangna. Manghaholongi musu, jala mansoadahon diri asa i do patuduhon na tung anak ni Debata hita. Ai molo lam tarimangi ianggo ngolu ni portibion dos do diadopan ni Debata. Ai ro do ibana tu saluhut halak marhite huasona, marhite na tinompana, nang narhite anakNa. Na gabe persoalan na godang do na so manjangkon. Tubu do roha na jahat, adong do parroha na geduk (on ma musu ni hakristenonta).
Na rap mangolu do hita dohot angka musu i, jala boi ra dohonon si sada parsaoran do hita. Ai nunga godang hakristenonta gabe holan sipaula. Ndang mangarimangi ujung ni ngolu dung mate. Godang na mangongkuhon na anak ni Debata, alai pangalahona ndang pataridahon na anak ni Debata.
Tasoadahon ma dirinta, ndada na ro sian portibion hita alai na sian Debata do sitompa saluhut. Saguru di Ibana do ngolunta! Tahaholongi ma donganta asa laos i dalan patandahon Jesus tu nasida. Ai marhite sian na manghaholongi saluhut portibion hita gabe anak ni Debata ma hita.
Tidak ada komentar:
Posting Komentar